EI CHAVÂ DÂH RIMA CHA

Sao daihti khô heih aw ta, châvâ daihti lôhlie chhih kawpa eima tlô heih aw. Châvâ noh khaipana ry liata lyuhbie eima paryh chiehpa zy nata na sahmia hnazô mothlaw lia a vaw lâ pathi heih aw ei ta. Vâchô sahpa lia chôthlapinô angia kawpa ta a vaw khai heih ti cha, kua khao lei awpa ta hro khô chiehpa zy rohpady heihpa ta, chatina chata, na nohthlapa nata na bie paryh chiehpa zy viavi khei laina chôta na moh ei vaw reih chanei heih tyh aw. Ei chavâ dâh rima cha la!!!

‎
‎Daihti zy khô lyma aw ta,chasipaw hawhta a zawpakhô beih leipa chasipaw daihti vaw tlô heih aw ta. Vâ chô sâhpa a ruapa lia khita chasipaw lâpi zy a vaw luah heih aw ei ta, chatina chata, pachâna ta na opi ei na tlôkhei heih aw , châhrasala, rohpadyna hnabeidyna dei a vaw ha bâ aw. Tlâhsâhpa nata Japansi zy khihpâh tobi awpa ta paw vaw pakai hei aw ei ta, chatina chata, chasipaw diahti a tlapa nata ei lôhliena raithli ama vaw loh kho aw, ei ch'aw vâ ka aw!!!!!
‎
‎Daihti sie lymapa heta chasipaw daihti khôkhei heih aw ta. Khizaw ziazi vaw roh aw ta, nâma vâpa ta lôhliena a vaw thyu heih aw. Râh hlapa liata meih zy a vaw lâ aw ei ta, notla lâta tlâh sâhpa zy meih ta a vaw khu khu khai heih aw. Âvyuh nata Chiachi paw pakai heih aw ei ta, hniehnô eima siesaina su zy liana chata rainô zy ao vaw ama vaw papua tina cha ta, mothli chhao ta na nohpahlipa rohpady ty aw na ta, chhôhso viavipa vâta na tha ei vaw ngia kaw aw!!!!
‎
‎Nopi daihti kho chhihpa khô aw ta, saopi daihti eima tlô heih aw. Sao daihti liata vâ pathaihpa vaw lâ aw ta, vâ chô sahpa liata  sao chôthlapinô khaipha angia ngaitapa a vaw khai heih aw. Aw.. Palôhliena nata chhôhso vâsâh taona zy vâta saopi vâ suapa hawhta ei pôhpa thachhâ kawpa he ngiachhiena rai hnei leipa ta ama sua thlô ti ta cha,  hna pangâtuh hnei leipa ta a zozâ khidei ta nâma vâna vâta vâ suapa nata ei raithli zy unawh hawhta ama lo kho ha bâ  aw, ei chavâ dâh rima bao cha la....!!!!

 

‎Y ngathlâ ha awpa ta eima khopa zy khô ei ta, hla angia chaipa chhao chhâna daihti a hnei tyh,

‎Na thah angiahna deikua paina noh rai hnei thei tlô va.

‎

‎Sao vaw tlô ta, chavâ na ta, chahrasala, khô ha heih ta,

‎Chasipaw vaw tlô ta, chavâ heih na ta, chahrasala, cha chhao cha khô hla heih ta.

‎

‎Âtahmâ nopi vaw tlô heih ta, chavâ kaw pyly heih na ta,

‎

‎Khatita ma nâma vâpa he daihti ta akhôkhei hra aw tly?

‎

‎Chyhsa thokha he cha eima kaolâh awpa ta Chô hiahvâ ta araopa châ leipa ta,

‎Eima pahno ngathlah hâ awpa ta chô Khazoh raopa tlao a vaw châ he tly ma..

‎

KYH EI PACHÂPA

KYH EI PACHÂPA (26 Oct. 2016)

 ‎Khizaw lia he palôhtlâna tluapa ta âlyna eima hnabeiseih tyh, eima hnabeiseihpa zy a vaw tlôkhai thai leipa vâ deikua palôhtlá a ki tyh vei. Pachârôhna he ta eima hro lia bie a hnei chai thlyu na! Eima hro liata y awpa ta eima kho leipa, hnabeiseih tlâh a châ leipa, eima pasô beih leipa 'pachârôhna' he a hro a vaw chhie kaw.

‎

‎Pachârôhna daihti liana heta â chhai/nyu nawpa pahno leipa ta y  na daihti vaw y thai kaw ta; alyna lâpi a chhih awpa eima chhuah no chhaota khâcharâ ta miah pakhâ ha tyh tuhpa a y tyh. Tovyuh liata palôhtlâhpa he alyna vaw chá hra sala, eima tovyu liata palôhtlâh awpa ta cha eima hnabeiseihpa zy eima kô miah adaih tua awpa a byuh tyh! Hlâno Ida sadô liata Adah nata Ivy paraona a hlykhei lymâ ha tlô pita; pachârôhna saikaoh tawhta sie syuslyu awpa ta eima thlahpa papuapa ta eima pôhpa cha dohlei ry liata y nawpa aparyh awpa a byuh ha ta. Cha hleikhô ta mo ta eima hmôpa zy he ta eima hro lia bie a hnei kaw ty hra.

‎

‎He khizaw khaihpa eima hmô tawhta heinawh a lyu leipa zy chhaopi ta, a khokhei rairina zy, a ngiachhie rairina zy nata kyh a pachâ rairina zy hneipa ta, eima kô nata pôhpa â nano lymâpa hawhta eima hro chhao a thla lymâ tyh pita.  He vâna he ta pacharôhna a tlôkheituhpa chhao he moto chô lia alyu khai hra vei. Keima pachârohna cha Kyhpachâ he a châ hla heih tyh. Kyhpachâna he chalei nata zua theipa châ leipa ta, sasyh apiena a châ viapa vâta kyhpachâtuhpa zy ta pachârôhna vaw tlô awpa eima hmô thai tyh khao vei.

‎

‎MAY BE I AM CRAZY

‎

‎Kha thyudyupa, ei tlaichhai sao hapa vâta a hru hapa ma ei châ tly? Ano cha daihti a khô chiehpa zydua liana khata palôh lia a rie beih leipa ta, pachâ palih beih hra va na. Kho apaoh kawpa a chapa vá zy, a pahnei nahta ahmi angia kawpa zy, a thlachhie leipa ta ei kiahpa lia a y tyhpa vâ zy, châ a thaithei kawpa nata riarôhpha kawpa a chapa vâta kyh apachâpa ei chapa chhaota apahno va na. Ano tawhta hnabeiseih awpa hmô hleileipa na ta, daihti heta a vaw tlôkheipa hawhta tlao ei pachâ.

‎

‎Ei tlaichhai zie zy, ei khozie zy nata kyh ei pachä zie zy he chho khoh kaw tyh hraw sala, apahno awpa tlao ei kâ a vaw chhie ha heih tyh. Mohropa zy ta Ano chô liata ei palôh phaozie ama pahno tlamaw aw tahpa kha ei chi chaipa a chá tyh. Cha hawhpa hmo a tlô lei nawpa ta keimahpa chhao tlai he ta âvaih tyh na ta; a châhtala keima nata keima chhao he a zo ty va na!

‎

‎Kyh ei pachâpa vâta a chô liata hmophapa ngala tlô sala tahpa kho tyhna ta, ahmialâ asie nawpa ei pachâ tyh. He vâna he ta khapahma a pahno awpa khoh leipa na ta. Hmeiseihpa ta la âtahma  bawlaw he ta ano my thei awpa ei khoh kaw. Kyh pachâ nata, kyh ei pachâ tahpa deikua a pahno vei.

‎

‎A kiahpa lia ypa he aly kaw tyh hraw sala, a ly hmeiseih beih va na.Khapahma apahno leina heta na palysa thei beih vei. A kiahpa liata hmoto taopa pha ta, theipa châ mawh sala, ei kyhpachâna bie he chho ngathla ha awpa ei kho…Châhrsala, a chhyna hnabeidy chhihpa ngala ei tovyuh a châ aw tahpa ei vaw chi kaw tyh. Anodeikuala, a yna dâ ei sai nata hnabeidy kawpa ta eina pa-ysa awpa ta la pangiasa va na, hmo hropa vâ tlao a châ? Ei pôhpa akiahpa lia a y lei no chhao ta ei pachâna palôhrupa deikua a kiahpa lia a y ngathla ha tyh.

‎

‎HUAISENNA A TLAWM TLAT SI

‎

‎Viapa thlalâ hmiakô liata na hnazô tobipa ta na tyu daihti reilei kawpa lia zy chhâ ta na palôh lia na vaw thei tyh hrala tahpa dei he ei kho kaw ty. Châhrasala, kheihhawhta tlai ma eina pachâ aw chi tahpa deikua la pahno va na; nâ lyna cha pakituh awpa châ deita na pachâ la tahpa ei kho.

‎

‎Atahma tai khapahma cha pahnosa leipa ta nama liata he tlupo ta vaw bua tyhna ta, Ahyma na cha tahpa pahno na ta, ei cha khona he pahlei theipa châ tlô va. Ei palôh o chhi nâma châta pahy na ta, châhrasala, angia awpa ta cha hrua ngâ va na. Ei kyhpachâna he ta kyhpachâna pyly a hnaw ha pa vâta khatita tlyma la kyhpachâna châ vaw hia aw na ta; chatina chata kyhpachâna eina pie khiah chita la, átahma ta ei pachârôhna zydua he alyna ta ei thla khai ha aw tahpa ei hnabeiseih.

‎

‎Khazia âtahma he ei cha chho hlâ vei tly? Ei cha hmô nona heta ei cha chho awpa châ vei ma? He kyhpachâna he pachârôhna ta ei hmâ ngathlah ha awpa a byuh ma? Ei palôhru na pasasa tuhpa ei nyupa he nyu leipa ta khazia ei cha chho hla vei tly? Ei na tlaichhai kaw chi tah tyh?Kei chhao ei cha tlaichhai tu hapa vâta kyh ei cha pachâ. Ei chhôhso beinô châ chi ta,cha my thei va na.

‎

‎HERE AM I, BUT WHERE ARE YOU?

‎

‎“Hy.... vâ chô sáhpa liata ryureituhpa chôthlapinô nata awhsi zy sai sai u, a nawh beileipa palôh riahphana na pie u la.

‎Hy... leilô nata a chhôh lia a y pa zydua sai u nama pyu a chado teh u, palôh keichheipa ta ei y, hna na pangâtuh awpa y vei ei."

‎

‎Khapahma pakhâpa a y lei no kha khazia ma kyh ei cha pachâ tahpa vaw chho leipa ma ei cha tly? Ano cha kyhpachâ nata, khoh na ta,ei tlaichhai kaw tlaina. Châhrasala , kyh ei pachâ tahpa apahno tlô va; na thah ei ngiahna zy chhochhi la pahno chhao ta pahno ngyu va chi aw. (Min nel em em a, keipaw’n ka nel a. Amaherawhchu, thian inkawm ngeih tak ang kan ni si. Ani’n thian tha tak anga min ngaih laiin kei chuan a thian tha tak chauh nih ka duh silo.)

‎

‎Kô zy lopa ta kô a vaw thieh heih tita la ei chho cheingei ba aw tah na ta. Kô vaw thieh ta, chho ngâh heih pyly leipa na ta, chho nawpa daihti chhao ei hnei. Chho awpa khoh kaw hra sala, a kiahpa lia ei riahphana a nawh ha tyh.

‎

‎Âtahmâ la Ano nata rainao kawpa ta atyh thei khao ma pi.......... Thaina sona a chu awpa ta khihpi rôhnah viapa lâ eina siesai ha ba.

‎

QUEEN OF MY HEART V

  Ahmiatuata he ei ku pualei kawpa, pasichhih kawpa nata khâpahma a châ leipa, keima liata a ypa  zydua he ta ku chalyu lei Samaw ei cha hlâ.

  He khizaw lia hrona a hneipa zydua nata a ruapa liata a pie theipa zydua hlâ chhao ta ei tly viapa nata ei vána a paithei beih leipa V. Chô Khazohpa ta a chhôh a zâ ta ei thlahchhâna zy a chyh ei tyh khiah châ atahmâ no na tläphano a châ nahta ei hnabeiseih. Kei chhao he ei pôhpa he la ei tlâphano a châ hra.

  Ei palôhru, ei pachâna nata ei thlahpa  zydua taihta chhâna noh hnei leipa ta noh chareih a rôh zôzaw thlâ hâ tyh. Ei pôhpa lia heta pasana reithei leipa hneipa ta ama chalyu nga tyh. Châhrasala, cha hawh pasa taopa ta ei y no chhao ta, nâ ei chavâ tu hapa vâta  pasa taopa ei châ tahpa eina pamysa heih tyh, a pasasa, tao a ru tah beih va na.

  Moh tua V ... he hawhta ei pasana ei reih papuapa vá heta na pachâ a vaw parôh kha y; molei kawpa ta ei y awpa na pangiasa hra kha. Chahleikhôta, a haona zie ta chhochhi la vaw pachâ kha y; nâ ei ca vâ tu hapa vâta he hawhta a y pa ei châ tahpa deikua vaw pahno ngathlâ hâ ma y.

  Na sâhmia mo-ai chhih leipa hmôthei leipa nata na-ao reikhâh nai kawpa thei leipa ta chhôh noh hmâ ngathlâpa zy hih......pihpasipa hlâ chhaota  apasa via  thlyu aw!! Nâ hlao leipa ta hronoh hmâ awpa a ki leipa ta, nâma leipa ta pahneipa chhao he nohthla a châna a vaw châ tahpa ei pahno papua. Ei khochaipa V... Na châta tlohna hnei vei hra'w sala ei theina zydua papuapa ta riethei lôliena zy ei vaw tao hnoly tyh. Ei kyhpachâpa hro nawpa châta a taopa ei châpa vâta apasa tah va na; chasala, ei taona chhâpa hawhta ei kyhpachâna ta achhyna khochhihpa a hmô vei khiah cha pasa taona apatho hlu via tahpa zy la na pahno awpa ei pangiasa.

  Atahma ta ei bierei awpa he nâma kyh liata bierei awpa na pangiarohsa chaipa a châ. Chahrasala, reih lei theilei awpa ta na kyhpachâna ta ei na zei tawh tly cha(nozana vâta ahyma a thi beih) tahpa palôh phaona chô ta ei kyhpachâna bie nawh kawpa ei cha vaw chho. He palôhru nâma tawhta a pasie thai khao leipa heta chhôhso mei hawh kâpa lôhliena ei na pahneisa tyh.

  Kyhpachâna lyuhbie chaw hlá aw sala âvá ziza lia ma alei thlâh ha aw tly? Na khizaw moh ei pahno tua noh tawhta ei palôh lia châh ha chi ta, na ao reikâh nata nâ pielyuzie zydua ta eina palysa kaw tyh. Kei la dyutlai leipaw, na châta phana ahnei leipa ei châ tahpa chhao ei pahno pasia kaw. Keima hlâta pha viapa nata sôh nata piah liata a bua leipa hlupi chhao kyh ama cha pachâ hra aw tahpa chhao ei pahno. Chasala, ei palôhru ta a khopa hapa kheitarai chasala hlaopatlo awpa ta nozana nata kâchhiena chô ta na kyhpachâ ei châ vaw hia hmeiseih. Na dytha na'wpa na tlua khia la reih awpa hlupi na hnei aw, ei tloleina nata sialeina zydua  mo pakhôpa ta he ei kyhpachâna nawh kawpa he na chhôhso liata na vaw pa ysa awpa ta ei cha haw hmeiseih.  Chapaw hry liata kho apaoh lei chaipa nata atlaina rai a hnei leipa he ta na kyhpachâna, na chhôhso liata su eina paruapa hra thei khiah chita la ei châly kaw aw. Nâ chhyna hmô awpa ta angiahtiah leipa ta kha ei vaw ha tyh aw.

   * Ei cha pahnona chhao a rei lei thlâ bao nahta he tlupo ta kyh ei cha vaw pachápa hmâpa he, keima sasyh chhao ta no-ah â tah nata ei zolei kaw tyh. Chahrasala, tahma la zo lei thei leipa nata pahno lei thei leipa ta, a thapi ta kyh ei cha vaw pachâ ha bâ hi. Âtanoh taihta kha zâ ta nama hry ta y pata, na ao reihkâh ei theipa kha reipachhie awpa nata papuapalei awpa pasai va na. Chahrasala, papuapaleipa ta ma a y ha tly i!!!??? Chasala V.. kyh kha ri cha pachâ hla chy. A chhâpa la *kyh cha pachâ leithei khao va na*.  Ei na zo leipa chhao a châ thei ngyu aw, ei cha khoh zie zydua chhopasia nawpa châta keima patlai he na hmâ la, hmô thei awpa nata pahno thei awpa ta kyh ei cha pachâ zie he na hmô aw. 

  Apasitu tlamaw na, a chhâ chaina liata ei reikhohpa la; nâma lâ a heihpa ta kyhpachâna báh khâ ei pazaw tahpa he a châ. A chhâpa na hiahri kha, achhhna nawpa hropa hnei hlei va na. Kyh cha vaw pachâ haw nata chavâta, kyh ei cha pachâ lei thei khao vei tahpa hleikhô rei via nawpa chhao pahno hlei hra na. V....y  he chhaolei chô lia mo manôh zy ta châ heihsaipa ta nata ama cha paphasai no chhaota kei la ei kyhpachâna a ualua thlâ ha aw. Tahma châta la a dai chy sy. 

NA CHÂTA TLOHNA RAI A HNEILEIPA

♡♡♡♡♡♡♡♡♡♡♡♡